Barcelona ka qenë thuajse pasive gjatë afatit kalimtar të janarit, me drejtuesit e klubit që kanë vendosur ta fokusojnë gjithë strategjinë në merkaton e verës së ardhshme.

Sipas mediave spanjolle, klubi katalanas shpreson që deri atëherë të jetë në rregull me Fair Play-in financiar, çka do t’i hapte rrugë afrimeve të mëdha.

Në rast se Barcelona arrin të stabilizojë situatën financiare dhe të sigurojë burimet e nevojshme, trajneri Hansi Flick tashmë ka paraqitur kërkesat e tij për merkato, duke identifikuar tre objektiva kryesorë.

Emri i parë në listën e Flick është Julian Álvarez. Transferimi i sulmuesit argjentinas shihet si shumë i vështirë, pasi kostoja minimale për kartonin e tij pritet të jetë rreth 100 milionë euro.

Për repartin defensiv, Flick ka përzgjedhur Alessandro Bastonin, shtyllën e mbrojtjes së Interit. Edhe ky operacion konsiderohet i kushtueshëm, me çmimin e mbrojtësit italian që vlerësohet në rreth 90 milionë euro.

Objektivi i tretë është Bernardo Silva, i cili, ndryshe nga dy të parët, mund të vijë pa pagesë transferimi. Mesfushori portugez pritet të jetë lojtar i lirë, gjë që e bën atë një opsion shumë tërheqës për Barcelonën./Arbresh.info